Postera ku shkruhet ‘Putini në Kosovë’ shfaqen në Mitrovicën e Veriut

Largimi nga institucionet i përfaqësuesve politikë të serbëve të Kosovës bëri që gjatë të shtunës të ketë tensione në pjesën veriore të Kosovës.

Lista Serbe, partia më e madhe e serbëve, vendosi që të largohet nga institucionet qendrore të Kosovës si dhe nga komunat në veri të vendit.

Këtë vendim, Lista Serbe e mori pas vendimit të autoriteteve të Kosovës për pezullimin e drejtorit të Policisë për rajonin e veriut, Nenad Gjuriç.

Gjuriq ishte pezulluar pasi refuzoi të zbatojë vendimin për riregjistrimin e makinave që kanë targa të lëshuara nga Serbia në ato të Republikës së Kosovës, shkruan KosovaPress.

Pas këtij veprimi, pjesëtarët e Policisë së Kosovës nga komuniteti serb zhveshën uniformat e tyre. U tha se ky vendim vlen deri në një njoftim, siç e quajtën ata, të arsyeshëm të Prishtinës për të respektuar marrëveshjet e Brukselit.

Që nga dita e djeshme strukturat paralele serbe kanë vazhduar të kërcënojnë me destabilizim. Të shtunën në mesnatë është publikuar një video ku shihen disa persona të maskuar në veri të Kosovës.

Sipas pamjeve të siguruara nga Istraga, vërehet se këta të maskuar shtënë me armë dhe bërtasin duke thënë se janë kthyer, duke aluduar për Kosovën.

Po ashtu, në Mitrovicë të Veriut janë shfaqur posterat me mbishkrimin “Putini në Kosovë” së bashku me flamurët rusë, krah atyre serb.

LEXONI GJITHASHTU:

• Serbët protestë në Mitrovicën e Veriut: Nuk duam shtet tjetër
• Zyrtari i NATO-s: KFOR i gatshëm të ndërhyjë nëse rrezikohet stabiliteti