Rusia pranon ndërhyrjen në zgjedhjet e SHBA

Yevgeny Prigozhin, një oligark rus i lidhur me Kremlinin, i njohur edhe si “kuzhinieri i Vladimir Putin”, pranoi ndërhyrjen e Rusisë në zgjedhjet amerikane.

Prigozhin deklaroi se Rusia ka ndërhyrë në procesin demokratik të Shteteve të Bashkuara, kur u pyet nga një gazetar nëse Moska po ndërhyn në zgjedhjet e mesmandatit që mbahen të martën.

“Ne kemi ndërhyrë, po ndërhyjmë dhe do të ndërhyjmë me kujdes, precizion kirurgjik dhe me stilin tonë, ashtu siç dimë ne. Gjatë operacionit do të heqim njëherësh si veshkat edhe mëlçinë”, deklaroi Prigozhin.

Oligarku nuk ka asnjë post në qeverinë ruse, por deklarata e tij duket se është e para që pranon fushatën e nivelit të lartë të Rusisë për të ndërhyrë në zgjedhjet e Shteteve të Bashkuara.

PRIGOZHIN është një nga njerëzit më të afërt të Putin, aq sa shtypi e ka etiketuar atë si “kuzhinieri” i presidentit rus, pasi dekada me parë filloi të organizonte eventet e pritjes në selinë e Kremlinit.

Më pas ai fitoi tendera të shumtë kateringu për shkollat dhe forcat e armatosura ruse dhe në vitin 2010 ishte në krye të një perandorie tregtare.

Nuk është e qartë se sa serioz ishte Prigozhin në komentet e tij, që më tepër duket se janë bërë në mënyrë sarkastike.

Por ai është sanksionuar nga administrata amerikane për financimin e Agjencisë së Kërkimeve të Internetit, një organizatë hakerash rusë e akuzuar për ndërhyrje në procese të ndryshme elektorale amerikane.

LEXONI GJITHASHTU:

• Rusia rekruton kriminelët/ Putin: Mobilizimi, një sukses, regjistrimet po rriten
• SHBA në OKB: Rusia dhe Kina mbrojnë Korenë e Veriut në Këshillin e Sigurimit