“E premtja e përgjakshme”, protesta masive në Iran

Mijëra iranianë protestuan të premten në juglindje të vendit për të përkujtuar viktimat e sulmit të forcave të sigurisë ndaj demonstruesve më 30 shtator, ditë kjo e njohur si “e premtja e përgjakshme”.

Amnesty International tha se forcat e sigurisë vranë të paktën 66 persona në shtator pasi qëlluan mbi protestuesit në Zahedan, kryeqyteti i provincës Sistan-Baluchistan.

Autoritetet njoftuan se përleshjet ishin shkaktuar nga disidentët. Në një video të postuar në Twitter nga llogaria e aktivistëve njerëzit shihen duke marshuar sërish në Zahedan.

Nov. 11, Khash, Sistan-Baluchestan;#MahsaAminipic.twitter.com/uw3BCTV674

— 1500tasvir_en (@1500tasvir_en) November 11, 2022

Një video tjetër nga qyteti juglindor i Kash tregon protestuesit duke shkelur dhe thyer një tabelë rrugore që mban emrin e gjeneralit Qassem Soleimani, i cili u vra në një sulm me dron amerikan në vitin 2020 në Irak.

Zemërimi i publikut në prag të të shtënave të 30 shtatorit u nxit nga pretendimet se një oficer policie kishte përdhunuar një vajzë adoleshente vendase. Autoritetet thanë se rasti është nën hetim.

Demonstratat antiqeveritare shpërthyen në shtator pas vdekjes së Mahsa Amini, e cila vdiq pasi u ndalua nga policia e moralit se nuk kishte vendosur si duhet shaminë e kokës.

Demonstratat në të gjithë vendin që atëherë janë shndërruar në një kryengritje popullore.

LEXONI GJITHASHTU:

• VIDEO| “Braverman ti mund të jesh kriminele, ne jo”, shqiptarët protestojnë në Angli
• Biden: Irani së shpejti do të jetë i lirë