INSTAT: Shkëmbimet tregtare vijuan rënien edhe në muajin gusht

Të dhëna të publikuara nga Instituti i Statistikave (INSTAT) tregojnë se për muajin gusht, ashtu si dhe për muajt e shkuar të këtij viti, ka pasur rënie të eksporteve dhe importeve.

Ajo që vihet re në muajin gusht, është se eksportet i kanë shpëtuar tekstilet dhe ushqimet. Eksportet e mallrave pësuan një rënie me 3.4 %, në krahasim me të njëjtën periudhë të një viti më parë dhe 21.1 %, në krahasim me korrikun e vitit 2020.

Për sa i përket periudhës tetë-mujore, tregtarët kanë eksportuar 169 miliardë lekë produkte, me një ulje 15.4%, krahasuar me një vit më parë dhe kanë importuar mallra me vlerë 376 miliarë lekë, me ulje 12.3%, krahasuar me një vit më parë.

Por, rënia e eksporteve nuk është problematika kryesore për fasonët shqiptarë. Sipas një ankete të kryer në 100 sipërmarrje në vend nga “Pro-Eksport Albania”, rezulton se problem madhor për këtë biznes aktualisht është: rritja e kostove, ndjekur nga ulja e prodhimit, mungesa e likuiditetit dhe mungesa e klientëve.

Kriza e fasonëve pasqyrohet dhe te reduktimi i stafit, teksa 64.1% e fasonëve po punojnë me kapacitet të reduktuar. Sipërmarrësit tregojnë se nëse vijohet në këto ritme, një pjesë e konsiderueshme e tyre do të mbyllin aktivitetin për 2 muaj, pasi nuk kanë likuiditet të mjaftueshëm për të paguar detyrimet.