Basha prezanton një plan me 5 pika për bizneset e prekura nga tërmeti

Gjatë një takimi me kryetarin e Partisë Demokratike, qytetarët kanë ngritur shqetësimet e tyre për pasojat e tërmetit që goditi Shqipërinë para disa ditëve.  

Përveç viktimave në njerëz dhe dëmeve në banesa, ata thonë se lëkundjet e 26 nëntorit patën pasoja edhe ne shumë biznese në Durrës dhe Thumanë, ku për shkak të largimit të banorëve drejt vendeve më të sigurta, në Durrës sipërmarrësit po përballen me pakësimin e forcës së punës.

“Ne, më tepër na janë dëmtuar shtëpitë e punëtorëve, që me forcat tona, i kemi stabilizuar deri diku. Nuk po stabilizojmë ata që na kanë ikur nëpër rrethe që nuk po na kthehen”, u shpreh një qytetar i shqetësuar.

Ndërkohë një qytetar tjetër thotë se dëmi më i madh tani është që nuk po veprojmë për të bërë diçka.

Pas këtyre takimeve kryetari i partisë Demokratike, prezanton planin me pesë pika për rimëkëmbjen e biznesit të prekur nga tërmeti. z. Basha këshillon përjashtimin e operatorëve ekonomikë nga taksa e pronës dhe tarifave vendore, përjashtim nga tatim fitimi për të gjithë ata që e rinvestojnë fitimin për të rikuperuar dëmet dhe heqjen e sigurimeve, si dhe pezullim dhe fshirje e pagesave të faturave të energjisë e ujit gjatë kësaj periudhe.

Ndërkaq kryedemokrati i bën thirrje sistemit bankar të riskedulojë këstet e kredive për operatorët ekonomikë në zonat e prekura.

Tërmeti i 26 nëntorit la pas 51 viktima dhe mijëra ndërtesa të shkatërruara.