Varhelyi mirëpret rihapjen e garës për në Gjykatën Kushtetuese: Me rëndësi të mos ketë më vonesa

Komisioneri i Bashkimit Evropian përgjegjës për zgjerimin, Oliver Varhelyi u shpreh të enjten se mirëpriste hapjen e garës për dy vakancat e tjera të Gjykatës Kushtetuese.

“Është thelbësore që të gjitha autoritetet ta mbështesin këtë proces pa vonesa. Kjo është një kërkesë kyçe e Këshillit Evropian me prioritet parësor,” – shkroi në Twitter Varhelyi teksa rikujtoi se Brukseli zyrtar mbështet Shqipërinë në rrugën e saj drejt integrimit.

I welcome the opening of application procedures for 2 vacancies of ??Constitutional Court. Essential that all ?? authorities support this process w no delay. This is a key requirement of @EUCouncil Conclusions prior to 1. IGC. EU continues to support Albania on its accession path

— Oliver Varhelyi (@OliverVarhelyi) September 24, 2020

Këshilli i Emërimeve në Drejtësi i kërkoi Kuvendit dhe Presidentit të rishpallin vakancën e dy vendeve në Gjykatën Kushtetuese. Pas kësaj kërkese Kuvendi dhe Presidenti u përgjigjën duke shpallur vakancat përkatëse, aplikim për të cilat do të ketë afat deri më 14 tetor.

Aktualisht, Gjykata Kushtetuese është jashtë funksionimit për shkak se anëtarët e saj nuk kaluan vetingun apo u larguan me vullnet të lirë. Vënia në funksion e saj deri në fund të këtij viti është një nga kushtet kryesore të BE-së për nisjen e negociatave për anëtarësim. Sipas ligjit dhe reformës në drejtësi, kjo gjykatë duhet të ketë 9 anëtarë, tre prej të cilëve emërohen nga Presidenti, tre të tjerë nga Kuvendi, dhe tre anëtarë zgjidhen nga Gjykata e Lartë.

Gjykata e Lartë ndërkohë është jashtë funksioni pasi ka vetëm 3 anëtarë nga 19 që duhet të kishte, kjo kërkon që për të plotësuar Gjykatën Kushtetuese të emërohen së paku 6 postet nga Presidenti e Kuvendi.

Në përbërje të saj, aktualisht Kushtetuesja ka vetëm katër anëtarë; Vitore Tusha, Elsa Toska, Marsida Xhaferllari dhe Fiona Papajorgji. Tusha ka për momentin kompetencat e kryetares, e cila në fakt zgjidhet me votim të fshehtë me shumicën e votave të të gjithë gjyqtarëve të Gjykatës Kushtuese, për një periudhë 3-vjeçare.

Lexoni gjithashtu:

Ambasadori gjerman takon kryetaren e KED: Ngritja e Gjykatës Kushtetuese, kriter për negociatat me BE

Çfarë duhet për negociatat? Gazetari i Ervin Koçi i Euronews Albania shpjegon në Ilva Now

Vakancat në Kushtetuese, KED i dërgon kërkesën Metës e Ruçit: Rihapni garën