Fjalori banal tek fëmijët po bëhet modë, sociologët: Prindërit të jenë të vëmendshëm

Prej disa ditësh në rrjetet sociale po qarkullon një video, ku duket një e mitur që përdor një fjalor mjaft banal teksa komunikon me një grua të moshuar.

Një fjalor i tillë ka ngritur shqetësimin e shumë personave për mënyrën sesi po rriten fëmijët sot.

“Pata shumë mësuese dhe edukatore që më thanë; ne këto i dëgjojmë përditë, aq shumë sa tashmë nuk i luftojmë dot pasi është prindi kundër mësuesit. I dëgjojmë këto të shara në gjuhën angleze dhe si formë mode, trendi, si diçka që përcjell humor tek familjarët. Unë uroj që prindërit realisht nuk e dinë ose janë në fazën që nuk duan ta besojnë që fëmija i tyre është në këtë lloj niveli”, thotë Marsida Simo, sociologe.

Një gjuhë e tillë po vihet re vitet e fundit si brenda dhe jashtë ambienteve të shkollës. Sociologët thonë se rrjetet sociale po ndikojnë që kjo mënyrë komunikimi të shihet edhe si diçka në modë.

“Ku janë prindërit?! Këta prindër që duan të bëjnë fëmijë duan të ndryshojnë botën. Dalin me pankarta dhe bëjnë thirrje, statuse dhe bëjnë kritika. Po ku janë këta prindër në familjet e tyre, që udhëheqin? Nëse po flasim për politika që nuk i pëlqejnë, atëherë çfarë ke bërë ti për politikat e tua në shtëpi?” shprehet sociologia.

Ekspertët ngrenë alarmin se familjet duhet të jenë më të vëmendshme kur fëmija përdor edhe në shtëpi një gjuhë të tillë.

LEXONI GJITHASHTU:

• “Qeveria nuk ka prioritet të rinjtë”, PL: Emigracioni fenomen alarmant
• Brezi i vjetër akuzon të rinjtë si dembelë