Ekonomia bie me 9%, BERZH: Shqipëria me rënien më të madhe në rajon

Banka Europiane për Rindërtim dhe Zhvillim (BERZH) ka mbajtur të pandryshuar pritshmërinë për ecurinë ekonomike të vendit në vitin 2020, për një rënie prej -9%, duke ulur ndjeshëm edhe parashikimin për rritjen ekonomike vitin e ardhshëm.

Në raportin “Perspektiva Ekonomike Globale në rajonet e BERZH”, të sapo publikuar, ekonomia shqiptare, pas rënies me 9% në vitin 2020 pritet që të rritet me vetëm 4.5% në vitin 2021.

Ky është rishikimi më i madh në ulje, jo vetëm për vendet e Ballkanit, por për të gjithë rajonin e BERZH.

Serbia pritet që ta vuajë më pak krizën, me një tkurrje prej -3.5% ndërsa Maqedonia e Veriut, Kosova dhe Bosnja do të shohin një rënie prej -5%.

Më herët, edhe Fondi Monetar Ndërkombëtar uli pritshmërinë për ecurinë ekonomike të vendit nga -5% në vlerësimin e prillit, në -7.5% në raportin e fundit.

Sa më shumë kalon koha aq më të zymta bëhen parashikimet e institucioneve ndërkombëtare për rritjen ekonomike të Shqipërisë si rrjedhojë e pasojave që po shkakton COVID-19, duke rezultuar një nga vendet që do ta vuajë më shumë krizën në Europë.