Serie-A, 15 lojtarë dhe zyrtarë me COVID-19, shtyhet ndeshja Genoa-Torino

Liga italiane e futbollit vendosi të enjten të shtyjë ndeshjen Genoa-Torino, e parashikuar për t’u luajtur këtë fundjavë, pasi 15 lojtarë dhe zyrtarë të klubit vendas rezultuan të infektuar me koronavirus.

Vendimi ka nxitur debate pasi vjen në shkelje të protokolleve të miratuara më parë nga UEFA, e cila thotë se ndeshjet luhen nëse të paktën 12 lojtarë plus një portier rezervë janë të shëndetshëm, në të kundërtën ndeshja humbet në tavolinë 3-0.

Klubi i Genoas raportoi fundjavën e shkuar infektimin e mesfushorit Lasse Schone dhe portierit Mattia Perin dhe pas diagnostikimit të tyre kishte nisur menjëherë zbatimin e protokolleve të sigurisë dhe kishte informuar autoritetet.

Të dielën Genoa e humbi 6-0 përballjen me Napolin. Rezultatet e para të testeve nga lojtarët dhe zyrtarët napolitanë kanë dalë negative, po kështu edhe të gjyqtarëve. Por çdo gjë pritet të qartësohet nga testet e dyta.