Ndryshimi i koalicioneve dhe listave, Nesturi, Kola dhe Shabani diskutojnë ndasitë mes palëve

Analistët politikë Plator Nesturi e Vehap Kola dhe aktivisti i Nismës Thurje, Endri Shabani, diskutuan në Ilva Now zhvillimet e fundit për sa i përket reformës zgjedhore, e cila mbetet ende e pazgjidhur pasi palët nuk po gjejnë konsensus për sa i përket koalicioneve parazgjedhore dhe hapjes së listave të kandidatëve.

Sipas Plator Nesturit, Partia Demokratike nuk është ende gati për fushatë. Ai e argumentoi këtë me faktin, sipas tij, se ende figura publike të saj nuk janë bërë pjesë e debatit publik për çështje që i shqetësojnë qytetarët.

Nesturi tha se PD-ja nuk mbajti një qëndrim të hapur për çështjen e koalicioneve. Mirëpo interpretimi se puna e opozitës në Këshillin Politik nuk ishte e qartë për sa i përket koalicioneve sipas analistit Vehap Kola është propagandë qeveritare.

“Këshilli Politik është në ngërç nga fakti se mazhoranca ka shkelur një nga shtyllat e marrëveshjes së 14 janarit, nuk pranon t’i zgjidhë çështjet me konsensus ose duke shkuar te ODIHR-i, dhe këtu nuk ka më problem opozita,” – u shpreh Kola.

“Janë 200 ditë përpara fushatës, ka një vit e gjysmë që kanë dalë nga parlamenti, kanë bojkotuar zgjedhjet vendore dhe do të ishte normale që ata të ishin në terren, të nxisnin debatin publik, por këtë ne nuk e shohim,” – shpjegoi më tej qëndrimin e tij Nesturi.

Mirëpo Kola replikoi duke thënë se “të folurit dhe të vlerësuarit nga një karrige është e thjeshtë” ndërsa “realiteti është ndryshe”.

Gazetarja Ilva Tare kërkoi që më tej aktivisti politik Endri Shabani të jepte opinionin e tij, duke qenë edhe jurist.

Shabani theksoi se “është e pandershme t’ia kërkojmë fajin opozitës kur e gjithë përgjegjësia, i gjithë pushteti është në dorën e Ramës”.

“A është përgatitur Basha apo Rama për zgjedhje, këto janë problemet e tyre, problemi ynë është a kemi mundësi të zgjedhim dhe a mund të kemi mundësi për garë të drejtë, sepse Rama po përpiqet t’ua imponojë rregullat e partisë së vetë partive të tjera,” – argumentoi Shabani duke e konsideruar “non-sens” konsensusin e kërkuar në Këshillin Politik.

Pyetjes nëse mund të ketë apo jo koalicione parazgjedhore me Kushtetutën e ndryshuar, Shabani theksoi se me këto ndryshime “ato pengohen”.

“Kushtetuta u ndryshua qëllimisht për të penguar koalicionet, të mos bëjmë sikur nuk e dimë këtë pjesë, nëse mundet apo jo kjo ha interpretim, por palët kanë zgjedhur një arbitër dhe arbitri do të jepte përgjigje por një nga palët po ndryshon rregullat e lojës dhe po përjashton edhe arbitrin,” – tha Shabani, i cili ishte i qëndrimit se kryetari i opozitës Basha “ia ka lënë fushën e lirë” kryeministrit Rama.

Për sa i përket hapjes së listave të kandidatëve, Vehap Kola tha se ato “nuk do të sjellin ndryshim të madh cilësor”, kjo duke pasur parasysh kriminalitetin dhe ndërfutjen e krimit thellë në shoqëri.

Nesturi e cilësoi “teknikalitet” çështjen e listave dhe tha se “debati që po bëhet për to janë pjesëza anësore nga qëllimi kryesor që partitë futen në zgjedhje”, mirëpo Shabani theksoi të kundërtën, pasi “mos-hapja e listave i bën deputetët të mos kenë përgjegjësi ndaj qytetarëve, pasi marrëdhëniet nuk do t’i kenë me ata që i zgjedhin, por me kryetarin që i kandidon”.