Spahiu ironizon ngritjen e satelitëve: Nuk duhen raketa për të parë katet pa leje

Analisti Kreshnik Spahiu ironizoi vendimin e qeverisë për ngritjen në ajër të satelitëve Albania 1 dhe Albania 2, nën argumentin për identifikimin e kateve pa leje.

Gjatë një interviste të dhënë për Euronews Albania, Spahiu tha se mendon se nuk është e nevojshme që të ngrihen raketa në ajër për të bërë të mundur identifikimin e kullave që kanë shkelur lejet e ndërtimit.

Ai tha se qeveria duhet të ishte më shumë transparente në sqarimin e arsyeve të lëshimit të satelitëve Albania 1 dhe Albania 2.

“Informacioni se pse i duhen satelitët është disi i mangët dhe i vetmi informacion që doli është nga hakerat iranian. Ajo çfarë dimë është një informacion shumë i shkurtër që lidhet me identifikimin e trojeve të ndërtimit, tokave bujqësore dhe identifikimin e fluksit të trafikut rrugor apo dy tre çështje të sigurisë. Nëse janë vërtet në funksion të këtyre çështjeve unë mendoj se këto 6 milionë euro nuk janë shumë. Ajo çfarë më bën të dyshojë është mungesa e transparencës, nuk mund të dalësh në facebook dhe të thuash u ngritën këto në ajër. Çfarë u ngrit në ajër, pse u ngrit dhe sa kohë do të qëndrojë në ajër?!

Nuk mendoj se duhet të ngriheshin raketat në qiell për të identifikuar katet pa leje”, tha Spahiu.