Sulm me thikë në ‘zemër’ të Parisit, agresori plagos 6 persona

Të paktën 6 persona mbetën të plagosur të mërkurën në stacionin hekurudhor “Gare du Nord” të Parisit, pasi u sulmuan me armë të ftohtë nga një person.

Një nga të lënduarit rezulton në gjendje të rëndë dhe ndodhet në një nga spitalet e kryeqytetit francez.

Sulmi ndodhi në orët e para të mëngjesit, në stacionin që ndodhet në zemër të distriktit numër 10 të Parisit.

Agresori u arrestua nga policia dhe burime nga kjo e fundit deklaruan se për momentin ngjarja nuk po trajtohet si sulm terrorist.

“Pista e terrorizmit nuk është ndër më të privilegjuarat”, thanë burimet. Aktualisht hetimet i janë besuar Brigadës Antikrim të policisë së Parisit.

Motivet e ngjarjes janë ende të paqarta. Agresori, i pajisur me një thikë, u ndalua nga oficerët të cilët përdorën disa herë armët e tyre.

Ai u mjekua në vendin e ngjarjes nga shërbimet e emergjencës, derisa u dërgua në spital.

Incidenti shkaktoi vonesa të shumta të trenëve në orën e pikut, me policinë që rrethoi stacionin dhe ngriti perde të bardha në vendin e ngjarjes.

“Gare du Nord” është një nga stacionet hekurudhore më të populluara të Evropës, me rreth 700 mijë udhëtarë në ditë.