Partizani shkarkon trajnerin Lerda, pas humbjes me Tiranën

Franco Lerda nuk do të jetë më trajner i Partizanit. Humbja përballë Tiranës në derbi ka rezultuar fatale për teknikun, i cili është shkarkuar nga drejtimi i kampionëve të Shqipërisë.

Ka qenë vetë “klubi i kuq” që ka njoftuar për largimin e trajnerit italian, nëpërmjet një njoftimi për shtyp.

Në deklaratën e kampionëve të Shqipërisë thuhet se ka qenë vetë presidenti i klubit Gazment Demi ai që ka vendosur për t’i dhënë fund bashkëpunimit me trajnerin Franco Lerda.

Partizani nuk ka bërë një nisje të mirë sezonit, pasi nuk po arrin që të ruajë hapin e vitit të shkuar, ku arriti të shpallej kampion.

Humbja përballë Tiranës ishte e dyta rradhazi në kampionat.

Për më tepër ishte disfata e parë pas pesë vitesh në një ndeshje derbi dhe me sa duket ecuria jo e mirë ka qenë edhe arsyeja e largimit të teknikut italian.