Rindërtimi, ministrja Denaj flet me gjuhën e shifrave: Sa donacione kanë ofruar të huajt dhe shqiptarët

Ministrja e Ekonomisë dhe Financave, Anila Denaj ka bërë një pasqyrë të plotë në shifra konkrete financiare mbi procesin e rindërtimit gjatë një interviste për “Ilva Now”. Për paratë e ofruara nga buxheti i shtetit, znj. Denaj tha se buxhetin e vitit aktual janë rialokuar për rindërtimin 310 milionë dollarë, kurse në buxhetin e vitit të ardhshëm është parashikuar një shumë prej 280 milionë dollarë. Në total tha ministrja, në tre vite do të ketë një buxhet prej 650 milionë dollarë.

“Në buxhetin e vitit të ardhshëm 280 milionë dollarë nga buxheti i shtetit do të shkojnë për rindërtimin. Janë parashikuar 650 milionë dollarë në tre vjet fonde për rindërtimin”, deklaroi znj. Denaj.

Shqipëria siguroi një fond prej 1.15 miliardë euro nga konferenca e donatorëve në janar të këtij viti, por një pjesë e mirë e këtyre fondeve ende nuk janë thithur apo alokuar. Nga kjo shumë, rreth 300 milionë janë grante. Ministrja tha se, thirrja e fondeve është një punë që vazhdon dhe do të vijoi edhe vitin e ardhshëm.

 “Shifrat janë dinamike dhe procesi nuk përfundon në një moment të caktuar edhe viti i ardhshëm do të jetë një vit ku do të vazhdojnë angazhimet për të thithur fondet e huas. Grantet janë duke u koordinuar për të realizuar projektet që vetë donatorët janë marrë përsipër për të financuar. Ata ndjekin procedurat dhe deri tani janë hapur disa kantiere për shkolla”, deklaroi ministrja e Financave dhe Ekonomisë.

Ndonëse për tragjedinë e ndodhur nga tërmeti i 26 nëntorit ku humbën jetën 51 persona dhe mijëra të tjerë mbetën të pastrehë, shumë biznesmenë shqiptarë u zotuan se do të jepnin kontributin e tyre, deri tani ky fond është vetëm 3 miliardë lekë.

“Regjistri i donacioneve është në drejtorinë e Përgjithshme të Thesarit. Nga rishikimi i buxhetit në korrik nga 34 miliardë lekë që kaluam për rindërtimin 3 miliardë lekë ishin nga donacione”, deklaroi ministrja gjatë intervistës në “Ilva Now”.

Intervista e plotë: