Revolucioni i trajnerit Reja, tekniku italian ka afruar një formacion të ri në më pak se një vit

Rezultatet e fundit të Kombëtares shqiptare ishin zhgënjyese, me kuqezinjtë që nuk morën më shumë se dy barazime me Kazakistanin dhe Lituaninë në transfertë.

Trajneri Edoardo Reja ka veçuar se objektivi i tij është për të rinovuar skuadrën me lojtarë të rinj që të jenë pjesë e skuadrës për dekadën e ardhshme. 

Italiani ka afruar një formacion me lojtarë të rinj, pjesën më të madhe të të cilëve ai i ka integruar edhe në fushën e lojës.

Duke nisur që nga porta me Marco Mollën, e duke vazhduar me Albi Dola, Ramen, Çepelen, Marash Kumbullën dhe Jon Mërsinajn, prapavija duket se jep garanci me lojtarë që kanë mjaft prespektivë.

Në mesfushë, Qazim Laçi, Sherif Kallaku, Lindon Selahi dhe Endri Çekiçi janë emrat e rinj që kanë marrë ftesë për herë të parë për të përfaqësuar Shqipërinë. 

Në sulm Taulant Seferi dhe Armando Broja kanë nisur që tani të japin kontributin e tyre, duke u inkuadruar në lojë.

Rezultatet në epokën Reja nuk kanë qenë në nivelin e pritshëm, por italiani duket se po e përligj atë çka ai ka deklaruar, për të sjell emra të rinj në skuadër.

Duke përjashtuar Qazim Laçin që i ka mbushur 24 vjeç, e gjithë pjesa tjetër e skuadrës është nën 23 vjeç.

Në 12 ndeshjet e deritanishme, Reja ka arritur të marrë 3 fitore, 4 barazime dhe 5 humbje, por në anën tjetër ka fituar një formacion të ri, që është i gatshëm për të ndihmuar ekipin për një periudhë të konsiderueshme.