Macron: Më shumë para për të transformuar ushtrinë

Presidenti francez Emmanuel Macron propozoi sot rritjen e alokimeve shtetërore për ushtrinë me më shumë se një të katërtën në periudhën e ardhshme, duke shpjeguar se kjo do të ndihmojë transformimin e forcave të armatosura për t’iu përgjigjur më shumë kërcënimeve të mundshme.

Buxheti i planifikuar për periudhën 2024-2030 do të mundësonte një program “transformimi” për të përshtatur ushtrinë me mundësitë e konfliktit me intensitet të lartë, i cili është bërë një nevojë edhe më urgjente që nga sulmi i Rusisë ndaj Ukrainës, tha Macron.

Buxheti për periudhën e përmendur do të arrijë në 413 miliardë euro, krahasuar me 295 miliardë euro në periudhën 2019-2025. Mesatarisht, kjo do të nënkuptonte një rritje të buxhetit vjetor ushtarak me 28.5 për qind nga 49.2 miliardë euro në 68.8 miliardë.

“Franca ka dhe do të ketë një ushtri të gatshme për sfidat e këtij shekulli”, tha Macron gjatë një fjalimi në bazën ajrore Mont de Marsan në jugperëndim të vendit.

Ai shtoi se Franca do të investonte më shumë në dronë dhe inteligjencë ushtarake dhe tha se po i kërkonte ushtrisë të kalonte në një strategji konflikti me intensitet të lartë.

LEXONI GJITHASHTU:

• Macron: Ekzekutimi i fundit i Iranit, akt i urryer dhe barbar 
• Kreu i Wagnerit: Luftëtarët e mi mund të mësojnë nga ushtria e Ukrainës