Kreu i Wagnerit: Luftëtarët e mi mund të mësojnë nga ushtria e Ukrainës

Kreu i forcave mercenare ruse Wagner, Yevgeny Prigozhin, tha të enjten se grupi i tij mund të “marrë mësim” nga ushtria ukrainase, përderisa beteja po vazhdon për qytetin e rëndësishëm në lindje të Ukrainës, Bahmut.

“Ushtria ukrainase po punon me qartësi dhe harmoni. Mund të mësojmë shumë nga ta”, tha Prigozhin në një deklaratë të publikuar nga shërbimi i tij për media.

Por, ai insistoi se “vendbanimi i Artemovskit do të rimerret”, në një deklaratë ku përdori emrin rus të qytetit Bahmut.

Për disa muaj, forcat e armatosura të Rusisë dhe luftëtarët mercenarë të Wagnerit kanë tentuar ta marrin këtë qytet në rajonin lindor të Donjeckut në Ukrainë.

Moska ka synim ta ketë nën kontrollin të gjithë rajonin e Donjeckut, shkruan REL.