Shtyhet seanca ndaj Zani Çaushit në Gjykatën e Korçës, i dënuar përjetë pretendon lirimin me kusht

Zani Çaushi është paraqitur në Gjykatën e Korçës, ku startoi edhe gjyqi për vlerësimin e kërkesë së tij për lirim me kusht.

Kreu i bandës së Çoles gjatë trazirave të vitit 1997, ka argumentuar në kërkesën e tij, të depozituar 3 muaj më parë, se ishte i gatshëm për rehabilitim dhe se kishte fëmijë për të rritur.

Seanca që zgjati vetëm disa minuta, shënoi edhe çeljen e procesit gjyqësor ndaj tij. Por trupi gjykues vendosi shtyrjen e saj, pasi mungonte zyrtari përfaqësues i Burgut të Drenovës.

Është pikërisht ky zyrtar, i cili merret me llogaritjen e kohës së vuajtjes së dënimit, në seancat gjyqësore. Një fakt i tillë u përcoll me shqetësim nga ana e avokatit mbrojtës, i cili e sheh të panevojshme një procedurë të tillë, që sjellë vetëm ngërçe dhe problem për të gjithë problemin e drejtësisë.

I pyetur nga gazetarët, avokati mbrojtës Arben Lena sqaroi se Kodi Penal, parashikon edhe lirimin me kusht të të dënuarve me burgim të përjetshëm.