Nis kthimi i fëmijëve shqiptarë nga kampi “Al-Hol” në Siri

Ka nisur operacioni për riatdhesimi i fëmijëve shqiptarë, të cilët ndodheshin në kampi “Al-Hol” në Siri. Operacioni humanitar pritet të rikthejë në familjet e tyre fëmijët e mbetur në Siri, një kërkesë kjo e vazhdueshme nga ana e familjarëve në Shqipëri. 

Gjysmëhëna e Kuqe Siriane ka publikuar një  video në faqen e saj zyrtare në “Facebook”, ndërsa thotë se riatdhesimi i fëmijëve të mbetur në kampin “Al-Hol”, është realizuar pas kërkesës së qeverisë shqiptare.

“Bashkëpunimi humanitar i kthen familjet nga kampi Al-Hol në Shqipëri Pas sigurimit të të gjitha lehtësive të nevojshme nga qeveria Siriane, përpjekjet e Gjysmëhënë së Kuqe Siriane në bashkëpunim me palët e interesuara, patën sukses në përfundimin e detyrës për kthimin e familjeve të banorëve të kampit në vendin e tyre, me kërkesë të qeverisë shqiptare”, thuhet në njoftim. 

Sipas informacioneve të fundit, thuhet se deri tani janë evakuuar nga kampi famëkeq katër fëmijë shqiptarë dhe një grua e plagosur.  Operacioni po asistohet edhe nga ana e zyrtarëve të Anti-Terrorit, të cilët prej javësh ndodhen ne Siri për të bërë të mundur riatdhesimin e shqiptarëve të bllokuar në “kampin e ferrit”.

Për këtë lajm të mirë ka reaguar edhe institucioni i presidencës shqiptare. Zëdhënësi i presidentit Meta, Tedi Blushi ka falënderuar angazhimin e Gjysmë Hënës së Kuqe Siriane për evakuimin e disa fëmijëve shqiptarë që ndodheshin në kampin sirian.

“Falënderojmë Gjysmë Hënën e Kuqe Siriane për lirimin e disa fëmijëve shqiptarë të kampit të Al Haël, të cilët shumë shpejt do të kthehen në Shqipëri. Tani punë për të kthyer të gjitha gratë dhe fëmijët që ndodhen në këtë kamp”, shkruan Tedi Blushi.

Gazetari i Euronews Albania, Eni Ferhati, ka mësuar  që kryeministri i vendit, Edi Rama është nisur drejt Libanit për të pritur të evakuuarit nga kampi “Al-Hol”.

Lexoni gjithashtu:

Kryeministri Edi Rama jep detaje për kthimin e shqiptarëve nga Siria

Kthimi i shqiptarëve nga Siria, Lleshaj prej dy ditësh takime intensive në Liban

Familjarët e të bllokuarve në kampin Al-Hol letër apeli për ndihmë kryeministrit Rama

Në kampet e ISIS-it, 80 shqiptarë mes të cilëve 50 gra e fëmijë mendohet të jenë në Lindjen e Mesme