Shtohen tensionet Turqi-Francë, reagon Ankaraja pas karikaturave të Charlie Hebdo mbi Erdogan

Zyrtarë të lartë turq dënuan një karikaturë kushtuar  Presidentit Tayyip Erdogan në të përjavshmen satirike franceze Charlie Hebdo, duke e cilësuar  atë një “përpjekje të neveritshme” për “përhapjen e racizmit dhe urrejtjes kulturore”. 

Ankaraja është shprehur se pas këtij aksioni do të ndërmarrë aksione konkrete dhe diplomatike

“Ne e dënojmë me forcë botimin në lidhje me presidentin tonë në revistën franceze e cila nuk ka respekt për asnjë besim, shenjtëri dhe vlera,” – shkroi zëdhënësi presidencës, Ibrahim Kalin në Twitter.

“Ata thjesht po tregojnë vulgaritetin dhe imoralitetin e tyre. Një sulm ndaj të drejtave personale nuk është humor dhe shprehje e lirisë,” – shtoi ai.

Karikatura në kopertinën e Charlie Hebdo,  postuar edhe në rrjetin social të revistës tregon presidentin Erdoganin të ulur, duke mbajtur një pije e ku duket edhe  një grua të veshur me hixhab islamik.

Zemërimi turk për karikaturën shton edhe më shumë tensionet midis Turqisë dhe Francës rreth karikaturave të Profetit Muhamed, të cilat nisën  pas vrasjes së një mësuesi  francez i cili u kishte treguar nxënësve karikaturat  gjatë një ore mësimi.

Nga ana tjetër shefi i Elisezë i ka mbrojtur karikatura të tilla duke i cilësuar si liri e shprehjes.

Erdogan kritikoi ashpër Macron duke thënë se lideri francez kishte nevojë për një kontroll të shëndetit mendor, duke e shtyrë Francën të thërrasë ambasadorin e saj nga Ankaraja.

Presidenti turk po ashtu në shenjë reagimi kërkoi bojkot të produkteve franceze.

Përplasja e fundit ashpërson tensionet mes dy shteteve por edhe të shefit të Elizesë me botën arabe ku ka patur protesta të shumta kundër tij.

Lexoni gjithashtu: 

Tensionet Erdogan-Macron, në disa shtete arabe bojkotohen mallrat franceze

Tensionohen raportet mes presidentit francez dhe botës arabe pas komenteve për karikaturat e profetit Muhamed

Presidenti turk Erdogan: Macron të kryejë kontrolle mendore