Ulen rastet me viroza në Shqipëri, rikthehet lia 

Rastet me grip apo virozat e stinës kanë ardhur në rënie përgjatë dy javëve të fundit.

Megjithatë mjekët pediatër referojnë sërish numër të lartë të fëmijëve të sëmurë, ku mesatarisht çdo mjek viziton 25 fëmijë.

“Vihet re që ka një ulje të personave të prekur dhe të rasteve ndërkohë që fëmijët vazhdojnë të jenë në të njëjtën gjendje, mund të them që krahasimisht me periudhën e janarit jemi pak më të qetë, nuk është ai fluksi i vizitave dhe virozave që kishim,” – tha mjekja pediatre Sonila Brati.

Virozat e dimrit, i kanë lënë vendin infeksioneve të rrugëve të sipërme respiratore, ndërsa është rishfaqur lia e dhenve.

 “Dominuese këto ditë janë  infeksionet e rrugëve respirator, kryesisht problemet e veshit të bajameve, ka rikthim të laringiteve apo kolla e thatë, ka dhe një rikthim të varicelës, apo lia e dhenve ku këto ditë është manifestuar me raste në çerdhe apo kopshte tek fëmijët,” – tregoi Brati.

Mjekët bëjnë apel që fëmijët  të mbahen në shtëpi përgjatë ditëve që janë të sëmurë, pasi vetëm kështu mund të shmanget përhapja e viruseve në grupe të mëdha, siç janë shkollat, kopshtet dhe çerdhet.

LEXONI GJITHASHTU:

• Pediatrja: Prindërit kanë frikë, u japin fëmijëve ilaçe pa kriter për temperaturën
• Pediatrja: Virozat te fëmijët po rikthehen 2-3 herë me temperaturë të lartë