Terror në zemër të Vjenës, Eva Dyrnjaja: Njerëzit kanë limituar daljet në qendër të qytetit

Në një intervistë për Euronews Albania, Eva Dyrnjaja, fizikante në Institutin e Terapive për Rrezatimin foli rreth sulmit terrorist që ndodhi në mbrëmjen e dy nëntorit dhe tregoi se ka qenë një natë e vështirë po aq sa e frikshme.

Shqiptarja që jeton në Vjenë tha se nuk do të guxonte të dilte pa problem për të shëtitur në qendër të qytetit të paktën për disa ditë pasi ngjarja që ndodhi e ka tronditur duke marrë parasysh që Vjena është një ndër qytetet më të sigurta.

“Unë jam e frikësuar, të themi që nuk do të guxoja për ca ditë të shëtisja pa kokëçarje në qendër të qytetit edhe pse tani në këto ditë ne jemi në lockdown-in e dytë për shkak të COVID-19,” – u shpreh Dyrnjaja.

Në fjalën e saj Eva Dyrnjaja tregoi se zyrtarisht raportohen katër të vdekur, njëra nga viktimat është grua ndërkohë që numri i të plagosurve të shtruar në spital është 17 ku 7 prej tyre janë në gjendje të rëndë.

Policia është shumë e rezervuar por ajo që dihet është se ka bërë kontrollet në shtëpinë e njërit prej atentatorëve.

Znj. Dyrnjaja tregoi për Euronews Albania se sot shkollat janë mbyllur dhe lëvizja e qytetarëve është shumë e rezervuar.

Më shumë informacion do të bëhet i ditur sot në deklaratën e kryeministrit në orën 11:30 pas një mbledhje që do të organizohet me qeverinë në orën 09:00.

Lexoni gjithashtu: 

Sulmi terrorist në Vjenë, katër të vdekur dhe disa të plagosur

Autori i sulmit terrorist në Vjenë dyshohet të ketë qenë me origjinë shqiptare

Emanuela Zaimi: Sulmi në Vjenë nga 10 persona, nuk raportohet për shqiptarë të lënduar