Ortodoksit festojnë ditën e verës, në Korçë ruhet tradita

Zjarret, buzëqeshjet e fëmijëve, veroret, kulaçi dhe urimet janë ritualet e përvitshme që kryen nga korçarët në fillim të muajit Mars, duke festuar kështu ditën e verës sipas traditës ortodokse.

Festa e cila nënkupton ikjen e ditëve të ftohta dhe ardhjen e pranverës vazhdon të festohet tradicionalisht nga korçarët.

“Dita e verës, ndërrimi i stinëve, sot është dita e fundit e dimrit, nesër fillon pranvera. E festojmë në mënyrë tradicionale, duke ndezur zjarrin, duke vënë veroret e duke shërbyer kulaç e fiq. Përgatisin kulaçin tradicional dhe e shpërndajnë nëpër familjarët e komshinjtë”, thotë një qytetar.

Një i moshuar, që çdo vit është afër zjarrit në fillimin e muajit Mars tregon sa e veçantë është për të kjo festë.

“Gjithmonë ka qene e është, kam ndezur zjarr që kur kam qenë si këta çunat e vegjël, e deri tani që jam 75 vjet e ndez zjarri çdo vit. Është traditë korçare”, theksoi ai.

Në juglindje dita e verës festohet në 1 mars, ndërkohë që zona të tjera të Shqipërisë e festojnë në datën 14 mars.