Lajçak në Prishtinë e Beograd, takime me Kurtin dhe krerët e opozitës para “Ohrit”

I dërguari special i BE për dialogun Kosovë-Serbi Miroslav Lajçak viziton të premten Prishtinën e më pas Beogradin.

Përveç kryeministrit Kurti, Lajçak pritet të takohet dhe me liderë të partive opozitare.

Kjo vizitë e Lajçakut vjen para takimit mes kryeministrit Albin Kurti dhe presidentit serb, Aleksandër Vuçiç, që është caktuar të mbahet me 18 mars, në Ohër të Maqedonisë se Veriut.

Kryeministri Kurti, pasi zyrtarisht ka pranuar propozimin evropian më 21 shkurt, ka thënë se negociatat për normalizim do të vazhdojnë

Dy partitë opozitare, PDK dhe LDK e kanë kritikuar Kryeministrit Kurti që pranoi propozimin evropian, i cili thonë se nuk sjell marrëveshje finale me Serbinë e as njohjen reciproke.

Sipas opozitarëve, Kurti, përmes këtij plani, ka pranuar themelimin e Asociacionit me kompetenca ekzekutive, dhënien e statusit të veçantë për Kishën Ortodokse Serbe në Kosovë dhe vazhdimin e pafundtë të bisedimeve me Serbinë.

Një çështje e nxehtë është dhe asociacioni. Më herët i dërguari i posaçëm i BE-së për dialogun, Miroslav Lajçak, ka beret e ditur se në tavolinën e tij ka 16 modele ekzistuese funksionale për Asociacionin e komunave me shumicë serbe, që i ka ndarë me Kosovën dhe Serbinë.

Sipas tij, ato mund të shihen si modele për të drejtat e minoriteteve dhe të gjitha janë në përputhje me standardet evropiane.

Lajçak tha se dy vendet duhet të bien dakord se si do të jetë dhe si nuk duhet të jetë Asociacioni, por që BE-ja, siç tha ai, nuk dëshiron të krijojë diçka që e bën sistemin e Kosovës më pak funksional.

“Po flasim me partnerët tanë për modele ekzistuese që po forcojnë funksionalitetin e shteteve dhe jo dobësimin, prandaj mendojmë se nuk duhet të ketë frikë. Askush nuk ka interes ta dobësojë funksionalitetin e Kosovës. Duhet ta shohim jo si kërcënim a dënim a kompromis, por obligim në njërën anë, dhe duhet të shihet edhe si ndërtim i mirëbesimit të serbëve të Kosovës dhe Qeverisë së Kosovës dhe definim të qartë të raporteve të Qeverisë së Serbisë me serbët e Kosovës, sipas standardeve evropiane”, tha Lajçak

LEXONI GJITHASHTU:

• Lajçak për Asociacionin: Kam ndarë me palët 16 modele ekzistuese evropiane
• Spanja s’e ndryshon qëndrimin për Kosovën, kërkon zgjidhje përmes dialogut