Rusia financon impiantin bërthamor në Bjellorusi, shtetet fqinje e kundërshtojnë

Aleksandër Lukashenko ka inauguruar hapjen e impiantit të parë bërthamor në Bjellorusi. Impianti është ndërtuar nga një firmë ruse, si dhe është financuar nga Moska, pasi kjo e fundit ka dhënë hua një shumë prej 10 miliardë dollarësh. Presidenti bjellorus është shprehur se “stacioni bërthamor do të jetë një hap drejt së ardhmes”.  

“Ky është një moment historik. Vendi do të shndërrohet në një fuqi bërthamore”, tha Aleksandër Lukashenko, president i Bjellorusisë.

Përfundimi dhe nisja e veprimtarisë së këtij projekti është kundërshtuar fuqishëm nga shtetet fqinje. Ky impiant ka ngritur kryesisht shqetësime nga Lituania dhe Letonia, pasi largësia  mes tij dhe dy vendeve është rreth 50 kilometra.

Rrezikshmëria e një impianti të tillë ka nxitur Letoninë që të ndërpresë tregtinë e energjisë elektrike mes vendeve, pasi ekziston frika e një ngjarjeje të ngjashme me aksidentin e Chernobilit në vitin 1986.

Gjithashtu, figura të opozitës bjelloruse kanë hedhur hipotezat se ndërtimi i impiantit bërthamor është një “armë gjeopolitike kundër Bashkimit Evropian”.

Inaugurimi I impiantit ka ardhur pas disa javësh protesta nga qytetarët bjellorusë, që kërkojnë dorëheqjen e presidentit Lukashenko, si dhe pas përplasjeve me policinë, ku janë arrestuar së fundmi edhe 30 doktorë.