Mbyllën grevën, qeveria jep 560 mln lekë për naftëtarët e Ballshit

Pas diskutimeve që patën me qeverinë dhe dakordësinë për të mos iu kthyer sërish protestave për 26 pagat e prapambetura, për naftëtarët janë vënë në dispozicion 560 milionë lekë. Lajmin e ka bërë të ditur, drejtoresha e Buxhetit në Ministrinë e Financave, Mimoza Dhëmbi.

“Ajo që kemi tjetër si shqetësim është pagesa e naftëtarëve. Duhet një shumë rreth 560 milionë lekë”, tha ajo.

Disa ditë më parë në takimin e tij me naftëtarët, kryeministri Edi Rama deklaroi se qeveria do të dilte garante për pagesa në formë asistence, por jo për shlyerjen e pagave. Fondi është votuar në Komisionin e Ekonomisë, edhe pse nuk është caktuar ende se nga do të merret.

Një ndryshim tjetër që u votua në zërat buxhetorë, ishte dhe fondi 1.2 mld lekë për medikamente anti-covid.

“Në lidhje me kostot e medikamenteve të Covid, unë mund t’ju sqaroj se shuma prej 1.2 mld lekësh erdhi si një vlerësim nga Ministria e Shëndetësisë me përllogaritjet që ata bëjnë për sëmundshmërinë, për tendencat”, theksoi ajo.

Në buxhetin e vitit 2021 është rishikuar gjithashtu formula e ndarjes së transfertës së pakushtëzuar në bashki duke u nisur nga goditja qe dha tërmeti i 26 nëntorit dhe numrit të bizneseve që kanë, duke mbështetur ato njësi që kanë më shumë vështirësi.

Lexoni gjithashtu: 

Pandemia, Meta thirrje Ramës: Të nisë testimi i qytetarëve, duhet të rimbursohet paketa anti-COVID