Frika nga COVID-19, Suedia kufizon grumbullimet publike

Qeveria suedeze vendosi të hënën të reduktojë përmasat e grumbullimeve publike në përpjekje për t’i bërë ballë valës së dytë të pandemisë, që ka shkaktuar një numër rekord infektimesh, duke bërë që të rritet presioni ndaj spitaleve.

Deri tani suedezët nuk u janë përmbajtur rekomandimeve për t’u mbrojtur nga koronavirusi dhe për këtë shkak kryeministri Stefan Lofven deklaroi se grumbullimet publike do të kufizohen në 8 persona, nga 300 që ishin më parë.

“Nga 24 nëntori, maksimumi 8 persona do të lejohen të grumbullohen në publik. Kjo është një normë e re për të gjithë shoqërinë suedeze. Ju bëj thirrje qytetarëve të mos shkoni në palestra, në biblioteka dhe të mos organizoni festa familjare. Anulojini të gjitha”, tha Stefan Lofven, kryeministër i Suedisë.

Vala e dytë e coronavirusit e ka prekur Suedinë pak më vonë se vendet e tjera të kontinentit evropian, por ritmi i infektimeve është rritur që nga fillimi i muajit, i shoqëruar me rritje të shtrimeve në spitale dhe në njësitë e terapisë intensive.

Vendi nordik tërhoqi vëmendje ndërkombëtare për përgjigjen e tij ndaj pandemisë, me shmangien e bllokadave dhe mos përdorimin e maskave, por duke u bazuar kryesisht tek masat vullnetare.

Mbi 6 mijë persona me COVID-19 kanë vdekur në Suedi që nga nisja e pandemisë, një nivel vdekjeje për banor më i lartë se ato të vendeve të tjera fqinje, por më i ulët se disa vende të tjera evropiane si Spanja.