Kapiteni i përfaqësueses Elseid Hysaj me COVID-19

Përfaqësuesja shqiptare e futbollit do ta luajë përballjen me Bjellorusinë pa kapitenin Elseid Hysaj.

Njëzetegjashtëvjeçari shkodran ka rezultuar pozitiv me COVID-19 në testin e fundit të bërë skuadrës.

Lajmi është njoftuar nga Federata Shqiptare e Futbollit në një deklaratë për shtyp në web-faqen e saj zyrtare.

FSHF tha se futbollisti, i cili aktivizohet me Napolin, është vënë në karantinë sapo ka marrë rezultatin në mbrëmje.

Federata siguroi se të gjithë lojtarët dhe stafi i përfaqësueses, kanë rezultuar negativë.

Pas infektimit me COVID-19, tashmë Hysajt i duhet të qëndrojë në Shqipëri deri sa të shërohet.

Shqipëria luan përballë Bjellorusisë mbrëmjen e së mërkurës në Tiranë, ndeshje kjo e vlefshme për Ligën e Kombeve dhe tejet vendimtare për fatet e Grupit 4 të Ligës C, pasi Bjellorusia ka 10 pikë ndërsa Shqipëria 8.

Një fitore e mundshme ndaj bjellorusëve do të thoshte marrje të kryesimit për Shqipërinë.

Në klubin me të cilën Hysaj aktivizohet, Napoli, nuk ka pasur të infektuar me COVID-19 kohët e fundit. Më parë janë infektuar Andrea Petagna, Piotr Zielinski dhe Eljif Elmas, të cilët kanë mundur të riaftësohen.

Ndërkohë për sa i përket përfaqësueses shqiptare, në muajin shtator pati pretendime mediatike se Ardian Ismajli, Ylber Ramadani dhe Hysen Memolla kishin rezultuar pozitiv me COVID-19, mirëpo FSHF i përgënjeshtroi këto duke publikuar rezultatet e analizave.