Pika ku bashkohen katër partitë të reja në zgjedhjet e 25 prillit

Në garë për zgjedhjet e ardhshme parlamentare do të jenë tre parti të krijuara rishtazi dhe Bindja Demokratike e regjistruar në 2019, por që garon për herë të parë. Ajo që i bashkon këto forca është fakti se janë të dala nga Partia Demokratike.

5 muaj përpara zgjedhjeve parlamentare të 25 prillit, vendi do të ketë të paktën edhe 3 parti të reja që do të marrin pjesë për herë të parë. Ato janë Nisma e Rudina Hajdarit, Lëvizja për Ndryshim e Jozefina Topallit dhe Lëvizja Demokratike për Ndryshim e Myslym Murrizit. Gjithashtu për herë të parë në zgjedhje parlamentare do të garojë Bindja Demokratike e Astrit Patozit.

Të 4 këto parti kanë dalë nga Partia Demokratike, kryetari i së cilës nuk i ka cilësuar si rrezik për rezultatin final. Në secilën prej tyre, vihet re një retorikë kundër lidershipit të selisë blu, gjithashtu edhe kundër kryeministrit.

Megjithatë këto formacione politike nuk e kanë mohuar bashkëpunimin me partinë demokratike sipas kushteve të tyre, njëri prej të cilit është edhe largimi i Lulzim Bashës si kryetar. Në kampin e majtë, situata duket më e qetë, nuk ka parti fraksionare, përveç partisë Social-Demokrate, e cila pritet të dalë në zgjedhje e vetme ashtu si në vitin 2017.