Deputetët protestë për pagat, marrin 156 mijë lekë që nga viti 2013

Deputetët dhe ministrat në parlament nuk preken nga rritja e fortë e pagave në administratën publike. Për këtë arsye, ata kërkojnë që të rishikohen edhe rrogat e tyre në planin e hartuar nga qeveria.

Një deputet i parlamentit shqiptar paguhet sot në llogarinë e tij 115 mijë lekë në muaj. Pra, paga bruto e tij është 156 mijë lekë. Sipas ligjit, ai përfiton edhe honorare në komisionet parlamentare, dieta për udhëtime jashtë vendit dhe rimbursim karburanti e telefoni. E gjithë kjo i shton portofolit të tij çdo muaj mesatarisht edhe 110 mijë lekë të tjera. Rrogat e përfaqësuesve të politikës janë fiksuar 10 vite më parë dhe angazhimi i qeverisë për rritur pagat në administratë nuk prek asnjë prej tyre, deputet, kryetar grupi a ministër qoftë.

 “Që në vitin 2013 nuk janë rritur asnjëherë pagat e ministrave, nuk janë rritur pagat e deputetëve dhe nuk kanë për tu rritur. As paga e kryeministrit sa të jem unë këtu”.

Kjo deklaratë është bërë nga Rama në tetor 2022, por 5 muaj më vonë kur ka një vendim për rritje të fortë pagash, deputetët kërkojnë rishikim për pagesat e tyre. Një kërkesë e tillë është bërë në zyrat e kuvendit, me mosvotimin e projektligjit të pagave në administratën shtetërore. Por si janë gjasat, që edhe në parlament të ketë ndryshime.

“Për sa kohë ne nuk jemi në gjendje që t’ia rrisim të tjerëve pagën deri në pikën ku ne të meritojmë të na rritet paga jonë, nuk kemi pse rrisim pagën tonë,” – deklaroi më herët ai.

Sot rroga e një deputeti është afërsisht sa gjysma e rrogës së presidentit. Rroga e Presidentit të Republikës propozohet që të rritet nga 257 mijë, në 425 mijë lekë në muaj ose 2.7 herë më e lartë se paga e deputetit.

LEXONI GJITHASHTU:

• Kuvendi: Të shkurtohen stafet e ujësjellësve, të shihen rrogat e shpërblimet
• Miratohet në Kuvend dhënia e fondeve për 14 majin