Rifillojnë bisedimet për Brexit, pak shanse për një marrëveshje

Edhe pse nuk dihet nëse do të kenë sukses apo do të dështojnë, bisedimet kokë më kokë për çështjen e Brexit do të rifillojnë këtë fundjavë. Ato ishin ndërprerë dhe zhvilloheshin virtualisht pasi ekipi i BE-së kishte hyrë në karantinë.

“Gjasat për një marrëveshje do të përcaktohen nga miqtë dhe partnerët tanë në BE, të cilët e dinë që ka një marrëveshje për t’u arritur, nga e cila mendoj se do të përfitojnë të dyja palët. Por le të jemi të qartë, ky vend mund të zhvillohet dhe do të zhvillohet fuqishëm edhe në rast të kundërt. Nëse arrihet një marrëveshje si ajo që BE ka me Australinë, atëherë suksesi do të jetë i madh”, deklaroi të premten Boris Johnson, kryeministër i Mbretërisë së Bashkuar.

Koha për një marrëveshje mbi marrëdhëniet e ardhshme tregtare mes Londrës dhe Brukselit po mbaron. Dështimi për arritjen e një akordi brenda 1 janarit, data kur periudha e tranzicionit të daljes së Britanisë nga Unioni përfundon, do të ketë pasoja ekonomike për të dyja palët.