Serbia tërhiqet nga vendimi për të dëbuar ambasadorin malazez nga Beogradi

Serbia është tërhequr nga vendimi për të dëbuar  ambasadorin e Malit të Zi. Një ditë më parë, Mali i Zi dhe Serbia kishin vendosur të dëbojnë ambasadorët reciprokë.

Pas një takimi me presidentin Aleksandër Vuçiç dhe konsultimeve me serbët e Malit të Zi Ishte kryeministrja serbe Ana Brnabiç ajo që bëri me dije vendimin e Beogradit.

“Ne kemi vendosur që Serbia në mënyrë të njëanshme të tërheqë vendimin për dëbimin e ambasadorit të Malit të Zi. Raportet e mira me Malin e Zi janë mbi të gjitha më të rëndësishmet për ne,” – u shpreh Brnabiç.

Kryeministrja shtoi se Beogradi dëshiron t’i shtrijë “dorën e bashkëpunimit dhe miqësisë” Malit të Zi dhe shpreson që vendimi të lehtësojë tensionet midis dy fqinjëve.Mali i Zi të Shtunën urdhëroi që ambasadori serb Vladimir Bozoviç të largohej nga vendi për “ndërhyrje të gjatë dhe të vazhdueshme në punët e brendshme të Malit të Zi”.

Disa orë më vonë, Serbia u hakmor duke dëbuar ambasadorin malazez në Beograd.

Mali i Zi rifitoi pavarësinë e plotë pas një referendumi në 2006, por historia e shtetësisë së tij mbetet një çështje e dhimbshme në kombin Adriatik.

Gati 30% e qytetarëve malazezë e konsiderojnë veten serbë etnikë.

Mosmarrëveshja midis dy shteteve të Ballkanit Perëndimor pritet të mos zgjasë shumë pasi një qeveri e re pro-serbe në Malin e Zi pritet të betohet të mërkurën.

Kryeministri i caktuar i Malit të Zi Zdravko Krivokapic kritikoi vendimin e qeverisë në largim për të përjashtuar ambasadorin serb dhe është zotuar të punojë në “shërimin e marrëdhënieve të Malit të Zi me Serbinë”.

Partia më e fuqishme e koalicionit është Fronti Demokratik, i cili kërkon lidhje më të ngushta me Serbinë dhe Rusinë dhe mbështetet nga Kisha Ortodokse Serbe.

Partnerët e tij, megjithatë, insistojnë që Mali i Zi të mbetet në kursin e tij pro-perëndimor.