Lewis Hamilton me COVID-19, do të mungojë për herë të parë një garë në karrierë

Shtatë herë kampioni i Formulës 1, Lewis Hamilton, do të mungojë në garën e Sakhirit për Çmimin e Madh të Bahrejnit këtë fundjavë. Shkak për këtë është bërë diagnostikimi me COVID-19 në testin e fundit rutinë që 35-vjeçari i është nënshtruar.

Mercedesi deklaroi se britaniku shfaqi simptoma të lehta të hënën dhe pas testeve të kryera rezultoi pozitiv. I njëjti rezultat doli edhe pas ritestimit gjë që e bëri të detyrueshëm vendosjen nën izolim të Hamiltonit.

Tashmë skuadra e Mrcedesit do të duhet të gjejë një zëvendësues, gjë që pritet të njoftohet ditët në vijim. Me gjasa do të jetë poloti testues, Stoffel Vandoorne.

“Përveç simptomave të lehta, Hamilton është mirë dhe e gjithë skuadra e përkrah përballë kësaj sprove dhe i uron atij shërim të shpejtë,” – u tha në një deklaratë për shtyp nga Mercedesi.

BREAKING: Lewis Hamilton will miss this weekend’s Sakhir Grand Prix in Bahrain after a positive test for Covid-19 pic.twitter.com/c0XCfyDmWZ

— Formula 1 (@F1) December 1, 2020

Më 15 nëntor, pasi fitoi në Turqi, Hamilton barazoi rekordin e Michael Schumacher me shtatë tituj kampion bote në Formulën 1.

E diela do të jetë mungesa e parë për Hamiltonin që prej debutimit të tij në Formulën 1 në vitin 2007.

Tashmë atij i duhet të shërohet dhe të rezultojë negativ në testet për COVID-19, në të kundërtën do të mungojë në garën e fundit të sezonit në Abu Dhabi më 13 dhjetor.

Vlen të theksohet se javën e shkuar piloti britanik qe testuar tre herë dhe pati rezultuar negativ, mirëpo përpara të hënës, kur shfaqi edhe simptoma, i qe komunikuar se një kontakt i afërt me të kishte rezultuar së fundmi pozitiv.

Hamilton bëhet poloti i tretë në Formulën 1 që preket nga koronavirusi. Më parë kanë qenë Sergio Perez dhe Lance Stroll.