Protesta në Shkup, VMRO-DPMNE kërkon dorëheqjen e Zaev pas negociatave me Bullgarinë

Partia më e madhe opozitare në Republikën e Maqedonisë së Veriut do të vijojë me protesta, të cilat po zhvillohen në Shkup.

Mbështetësit e VMRO-DPMNE janë mbledhur përpara godinës së qeverisë dhe Ministrisë së Jashtme duke kërkuar largimin e kryeministrit Zoran Zaev, pasi sipas tyre ky i fundit po arrin një marrëveshje të fshehtë me Bullgarinë.

Gazetarja e Euronews Albania në Shkup, Ferikan Iljazi raportoi se opozita është duke protestuar për shkak të cenimit të identitetit dhe gjuhës maqedonase nga ana e bullgarëve.

“Opozita është duke protestuar për shkak të cenimit të identitetit dhe gjuhës maqedonase nga ana e bullgarëve. Gjë që ka çuar deri tek bllokimi i rrugës së Maqedonisë së Veriut në BE. Për këtë shkak VMRO-DPMNE po proteston kundër qeverisë Zaev dhe dyshon se po bën negociata të fshehta, ku është në pikëpyetje identiteti dhe gjuha.

Protestuesit kërkojnë dorëheqjen e Zaev dhe kërkojnë të shpaloset gjithçka rreth atyre bisedimeve të fshehta që thuhet se po zhvillohen ditët e fundit. Ende nuk ka pasur një deklaratë nga Zoran Zaev”, u shpreh ajo.

Sipas saj, kreu i VMRO-DPMNE, Hristijan Mickovski ka deklaruar se gjatë fundjavës ka pasur takime të fshehta mes zyrtarëve maqedonas dhe bullgarë, për të cilat nuk dihet asgjë.

“Ai thotë që ka informacione të tij personale dhe gjatë fundjavës ka pasur takime mes zyrtarëve të Maqedonisë së Veriut dhe bullgarëve. Janë informacione politike që i vijnë nga rrethi i tij. Ai e di që ka bisedime dhe nuk e di përmbajtjen e atyre bisedimeve”, përfundoi gazetarja.

Lexoni gjithashtu:

Zoran Zaev: Ne do të hyjmë në BE si maqedonas që flasin maqedonisht