Tentoi të vriste 2 persona duke i përplasur me makinë, në kërkim 22-vjeçari

Policia e Fierit ka zbardhur ngjarjen e ndodhur 6 ditë më parë, të raportuar filimisht si aksident rrugor.

U shpall në kërkim shtetasi P. D., 22 vjeç, banues në Patos, pasi nga hetimet paraprake dyshohet se më datë 01.05.2023, rreth orës 18:30, në fshatin Sheqishte, 22-vjeçari dhe babai i tij, shtetasi A. D., për motive të dobëta, janë konfliktuar fizikisht me shtetasit E. Sh., 26 vjeç, D. L., 30 vjeç dhe me një 15-vjeçar.

“Pas konfliktit, dyshohet se shtetasi P. D. ka përplasur qëllimisht me automjetin që drejtonte, shtetasit E. Sh. dhe D. L. ( të cilët ndodheshin jashtë automjetit në momentin e përplasjes) dhe automjetin me të cilin udhëtonin këta shtetas, si dhe ka përplasur aksidentalisht edhe një automjet tjetër, të parkuar anash rrugës. Më pas dyshohet se shtetasi P. D. ka marrë automjetin e shtetasve të dëmtuar për t’u larguar nga vendi i ngjarjes”, sqaron policia.

Nga përplasja janë dëmtuar shtetasit E. Sh. dhe D. L., të cilët ndodhen në spital, në kujdesin e mjekëve.

Automjeti i shtetasit E. Sh. u gjet nga policia, i braktisur në fshatin Visokë, Mallakastër, ndërsa vijojnë kërkimet për 22-vjeçarin.

LEXONI GJITHASHTU:

• Aksident masiv në autostradën Tiranë-Durrës, përplasen 5 makina
• Aksident i rëndë në Devoll, makina del nga rruga si pasojë e shpejtësisë