Dita Kombëtare e Rinisë, ambasada amerikane: Të nderojmë ata që kontribuojnë për një Shqipëri më të mirë

Ambasada amerikane në Tiranë ka uruar shqiptarët për Ditën Kombëtare të Rinisë.

Në një reagim në Facebook, ambasada thekson se rinia shqiptare 30 vjet më parë rrëzoi komunizmin, por shton se ende vazhdon puna për një Shqipëri më të mirë.

“Urojmë të gjithë shqiptarët teksa festojnë Ditën Kombëtare të Rinisë, e cila këtë vit shënon 30 vjetorin e lëvizjes studentore që solli rrëzimin e komunizmit më 8 dhjetor, 1990.

Sot është një ditë për të nderuar studentët e guximshëm, të cilët protestuan kundër diktaturës dhe sollën demokracinë e lirinë në Shqipëri, si dhe për të vlerësuar përparimin që është bërë në këta 30 vjet nga Shqipëria, tashmë një anëtare e plotë e NATO-s dhe drejt rrugës së Bashkimit Europian.

Është gjithashtu edhe një ditë për t’u siguruar që sakrificat që ata studentë bënë nuk do të harrohen, dhe për të nderuar ata që ende kontribuojnë për një Shqipëri më të mirë. Shtetet e Bashkuara do t’a mbështesin gjithnjë popullin shqiptar në këtë udhëtim. #KrahPerKrah”, thuhet në reagimin e ambasadës.

Lexoni gjithashtu:

24 eurodeputetë thirrje BE-së të mos vonojë hapjen e negociatave me Shqipërinë dhe Maqedoninë e Veriut