Rritet shitja e armëve, 361 miliardë dollarë në vit; SHBA eksportuesi i parë

Shitja e armëve nga 25 kompanitë më të mëdha të industrisë ushtarake në botë arriti në 361 miliardë $ në 2019-n, 8.5% më shumë se në vitin paraardhës.

Kështu thotë një studim i publikuar të martën nga Instituti Ndërkombëtar i Paqes në Stokholm.

Pesë vendet e para janë zënë nga gjigantët amerikanë, që bashkë me 7 kompani të tjera po amerikane përbëjnë 61% të shitjeve globale.

Pas SHBA, Kina llogaritet shitësi i dytë më i madh në botë, me 25 kompani, që përbëjnë 16% të totalit.

Ndërkohë, të marra së bashku 6 kompani të Evropës Perëndimore zënë 18 për qind të shitjeve. Ndërsa 2 kompanitë ruse në renditje përbëjnë 3.9 për qind.

Për herë të parë, një kompani e Lindjes së Mesme është kthyer në një nga furnizuesit kryesorë të armëve në botë. “Edge”, me bazë në EBA, zë vendin e 22-të në renditje dhe llogarit 1.3 për qind të totalit të armëve të shitura nga 25 kompanitë.

Për studiuesin suedez Pieter Wezeman, kërkesa e lartë për armë nga qeveritë lokale dhe synimi i vendeve të Lindjes së Mesme për t’u bërë të pavarura nga prodhuesit e huaj po favorizojnë rritjen e kompanive në këtë rajon.