Gjermania bie në recesion, teksa inflacioni i lartë vijon të godasë ekonominë

Inflacioni i vazhdueshëm ka shtyrë Gjermaninë drejt recesionit për tre muajt e parë të këtij viti, shkruan BBC.

Ekonomia më e madhe e Evropës u ndikua kur furnizimet me gaz rus u shteruan pas pushtimit të Ukrainës, thanë analistët.

Ekonomia u tkurr me 0.3% midis janarit dhe marsit, tha zyra e statistikave.

Kjo pasoi një tkurrje prej 0.5% në tre muajt e fundit të vitit të kaluar.

Një vend konsiderohet të jetë në recesion kur ekonomia e tij tkurret për dy periudha tre mujore.

“Nën peshën e inflacionit të jashtëzakonshëm, konsumatori gjerman ka rënë në gjunjë, duke tërhequr të gjithë ekonominë me vete,” tha Andreas Scheuerle, një analist në DekaBank.

Norma e inflacionit të Gjermanisë qëndroi në 7.2% në prill, mbi mesataren e zonës së euros, por nën 8.7% të Mbretërisë së Bashkuar.

Çmimet e larta kanë rënduar mbi familjet gjermane duke bërë që të ulen shpenzimet për të ushqimin, veshmbathjet dhe mobiljet. Ulje të shitjeve ka pasur dhe për industrinë, duke reflektuar ndikimin e çmimeve të larta të energjisë tek bizneset.

Shifrat e rishikuara treguan se shpenzimet e familjeve ishin 1.2% më të ulëta se në tremujorin e mëparshëm.

Shpenzimet qeveritare ishin 4.9% më të ulëta dhe shitjet e makinave gjithashtu ranë pasi grantet e qeverisë për makinat elektrike dhe hibride u zvogëluan.

Recesioni ishte më pak i rëndë nga sa kishin parashikuar disa, duke pasur parasysh varësinë e madhe të Gjermanisë nga energjia ruse. Një dimër i butë dhe rihapja e ekonomisë së Kinës, ndihmuan në lehtësimin e ndikimit të çmimeve më të larta të energjisë.

Investimet dhe eksportet e sektorit privat u rritën, por kjo nuk ishte e mjaftueshme për ta nxjerrë Gjermaninë nga “zona e rrezikut” për recesion, thanë analistët.

“Treguesit e hershëm sugjerojnë se gjërat do të vazhdojnë të jenë po aq të dobëta në tremujorin e dytë të vitit 2023,” tha analisti i bankës LBBË, Jens-Oliver Niklasch.

LEXONI GJITHASHTU:

• Masa ndaj aktivistëve të klimës në Gjermani, të rinjtë akuzohen për grup kriminal
• BE i kërkon Gjermanisë të investojë në energji të rinovueshme