Buxheti 7-vjeçar i BE-së: gazetarja Shuka: Më i madhi në historinë e Bashkimit Europian

Gazetarja e Deutsche Welle (DW), Anila Shuka, tha për Euronews Albania se që në momentin e parë të marrjes së kryesisë Angela Merkel është pro çeljes së negociatave me Shqipërinë dhe Maqedoninë e Veriut.

“Për çeljen e konferencës së parë ndërqeveritare dihet se Shqipëria duhet të plotësojë kushtet të cilat nuk i ka plotësuar akoma dhe ky ishte dhe shkaku se përse nuk u arrit që të miratohej kuadri negociues,” – tha Shuka.

Gazetarja e DË tregoi se Gjermania e ka mbështetur propozimin e sekretariatit të BE-së për ta ndarë Shqipërinë nga Maqedonia, meqenëse Maqedoninë po e bllokon Bullgaria aktualisht.

Ajo theksoi se ka qenë e vështirë të ndërhyet në bindjet e shteteve edhe për shkak të situatës së krijuar nga pandemia.

“Borisovi vendosi ta bllokojë Maqedoninë dhe kancelarja gjermane ndoshta mund të kishte pasur mundësi për shembull, në procesin e Berlinit, nëse do të shkonte në Sofje të fliste dhe të diskutonte me të dhe t’ia kthente mendjen Borisovit por ishte e vështirë të arrihej një kompromis i tillë për shkak të pandemisë,” – tregoi gazetarja Shuka.

Sa i takon fjalimit emocional të Merkel në Bundestag, gazetarja sqaroi se lidhet me faktin se as Merkel dhe askush nuk po i vë fre infektimit të popullsisë nga COVID-19.

“Për fat të keq kancelarja nuk ka mundësi më të japë urdhra dhe ta vendosë ajo se si duhet që të zgjidhet çështja e pandemisë,” – shtoi Shuka teksa theksoi edhe njëherë që Merkel është treguar emocionale përballë pamundësisë për të bërë diçka konkrete për situatën.

Jo vetëm miratimi i planit të rimëkëmbjes por dhe buxheti 7 vjeçar është buxheti më i madh që ka parë ndonjëherë historia e Bashkimit Europian dhe ky kompromis është parë me sy kritik edhe në Gjermani, siç tregoi dhe gazetarja e DË.

“Jo të gjithë e shohin kritike, është tipike kompromis Merkelian,” – tha Anila Shuka për të treguar kësisoj dhe qëllimin e gruas më të fuqishme në botë që është të mbajë Bashkimin Europian të Bashkuar.