Bllokohen 5 varka dhe një traget në liqenin e Komanit, gjobiten pronarët

Policia e Shkodrës ka bllokuar 5 varka artizanale që përdoreshin për transportimin e turistëve në liqenin e Komanit. Uniformat blu kanë ndëshkuar me masë administrative prej 10 000 lekësh të rinj, secilin prej drejtuesve të tyre.

Gjithashtu bëhet me dije se është bllokuar dhe një traget si dhe është proceduar penalisht dhe pronari i tij.

Trageti u sekuestrua pasi gjatë verifikimeve të kryera nga specialistët e Seksionit për Hetimin e Krimeve Ekonomiko-Financiare të DVP Shkodër, në kalatën e liqenit të Komanit, është konstatuar se ky traget ishte i paregjistruar në organet tatimore, kishte punonjës te paregjistruar, si dhe mungonte leja e drejtimit për guidimin e tij.

Policia bën me dije Operacioni “Komani”, për kontrollin e mjeteve lundruese do të vijojë dhe bëhet me qëllimin për rritjen e sigurisë së turistëve dhe vizitorëve në liqenin e Komanit.

“Drejtoria Vendore e Policisë Shkodër apelon për të gjithë operatorët turistikë, poseduesit dhe përdoruesit e mjeteve lundruese, turistike dhe argëtuese, që të pajisjen me dokumentacionin e plotë tatimor për ushtrimin e kësaj veprimtarie tregtare, si dhe që të pajisen me dëshminë e aftësisë (leje guidimi), me qëllim rritjen e parametrave të sigurisë së jetës së pushuesve dhe vizitorëve”, njofton policia.