COVID-19 në Evropë, ashpërsohen masat në prag festash, nga sot Gjermania në izolim

Gjermania po bëhet gati të hyjë në një izolim të ashpër, pasi numri i infektimeve me COVID preku nivele rekord. Restorantet, baret dhe subjekte të tjera kanë mbyllur dyert që në nëntor dhe të mërkurën do të mbyllen shkollat dhe dyqanet e panevojshme.

 “Nga njëra anë, më duket i tepruar. Ndoshta izolimi duhej vendosur më herët dhe tani do të ishim të qetë dhe rehat dhe mund të shkonim për të bërë pazare”, u shpreh një qytetare në Berlin.

 “Mund të jetë e nevojshme. Çdo vend në Evropë ka mënyra të ndryshme për t’u përballur me këtë. Mendoj se kjo është më e mira”, tha një tjetër banor.

Ndërkohë, në Çeki restorantet, hotelet dhe palestrat, që u rihapën 2 javë më parë, do të mbyllen sërish nga e premtja.

Holanda ka hyrë në një izolim 5-javor, me dyqanet e panevojshme, teatrot dhe palestrat që po mbyllin dyert.

Shkollat do të bëjnë të njëjtën gjë nga e mërkura, por kufizimet do të lehtësohen për 3 ditë për Krishtlindje, kur në shtëpi do të lejohen 3 mysafirë.

Në Britani, qeveria po përballet me thirrje për të rishikuar planet për lehtësimin e kufizimeve për Krishtlindje.

Dy gazeta mjekësore kanë paralajmëruar se një gjë e tillë mund të marrë jetë njerëzish.

Nga e mërkura, mbi 60 për qind e Anglisë do të jetë në nivelin më të lartë të kufizimeve, me club-et dhe restorantet e mbyllura dhe grumbullimet publike do të lejohen vetëm në Londër dhe në disa zona në jug-lindje.

Në Itali njerëzit kanë mbushur rrugët për pazaret e Krishtlindjes, pasi shumë rajone lehtësuan masat anti-COVID.

Por mediat raportojnë se qeveria po shqyrton forcimin e tyre nga frika se mund të ketë një valë tjetër infeksionesh.

Nga e marta, në Francë izolimi total do zëvendësohet nga një shtetrrethim nga 8 e mbrëmjes në 6 të mëngjesit. Kufizimet e udhëtimeve ndërkohë janë hequr.

Kryeministri Jean Castex po inkurajon njerëzit të vetë-kufizohen për 8 ditë përpara se të takojnë miqtë dhe familjet për Krishtlindje, sesa të bëjnë teste individuale për coronavirus.

Lexoni gjithashtu:

Mutacion i ri i COVID-19, mbyllen përfundimisht lokalet dhe restorantet në Mbretërinë e Bashkuar

Nga sot Gjermania në izolim të plotë, mjeku Alk Shehu: Vendi në një presion të madh, një hap para fazës finale të luftës ndaj COVID