Zelensky në zonat e përmbytura nga diga, premton ndihma financiare për të dëmtuarit

Presidenti ukrainas Volodymyr Zelensky ka vizituar të enjten rajonin jugor të Khersonit, për të koordinuar bashkë me autoritetet lokale operacionet e emergjencës, pas katastrofës së shkaktuar nga shkatërrimi i digës në Khakovka, për të cilin Kievi akuzon ushtrinë ruse.

Si pasojë e dëmtimit të digës, uji që ka rrjedhur ka përmbytur dhjetëra fshatra që ndodhen në brigjet e lumit Dnieper.

Zelensky ka propozuar hartimin e një programi për të lehtësuar dëmet ekonomike, si dhe për ripërtëritjen e ekosistemit të rajonit.

Sipas Kievit, shkatërrimi i digës dhe rrjedhja e ujit erdhën si pasojë e vendosjes së lëndëve shpërthyese nga Rusia, edhe pse Moska ka mohuar çdo përgjegjësi.

Ndër të tjera, presidenti ka falënderuar skuadrat shpëtimit që kanë ndihmuar personat në vështirësi, me të dhënat e para që flasin për 5 persona të vdekur nga përmbytjet.

Autoritetet vendase deklarojnë se të paktën 4 mijë persona janë evakuuar si nga zonat e kontrolluara nga trupat ukrainase ashtu edhe nga ato në duart e rusëve në të dy anët e lumit Dnieper, që është bërë pjesë e vijës së frontit mes dy ushtrive.

Zelensky ka ngritur gjithashtu mundësinë për një ndihmë financiare për familjet dhe bizneset që janë dëmtuar nga vërshimi i ujërave.

Autoritetet po përpiqen gjithashtu t’u sigurojnë qytetarëve ujë të pijshëm, të shpëtojnë kafshët e bllokuara nga uji dhe të ndalin dëmet ambientale.

LEXONI GJITHASHTU:

• Zelensky mbledh Këshillin e Sigurimit pas sulmit në digë
• Shembja e digës ukrainase, banorët marrin arratinë