Një gjykatë për Putin, sa shanse kanë SHBA dhe BE të procedojnë presidentin rus

Masakrat në Buça, në periferi të Kievit, janë bërë sinonime të krimeve ruse të luftës në Ukrainë. BE dhe SHBA duan t’i mbajnë liderët rusë përgjegjës për krimin ndërkombëtar të agresionit në Ukrainë, por procedimi i tyre po rezulton i vështirë.

Wayne Jordash, avokat për të drejtat e njeriut deklaron:“Sa i takon krimit të agresionit, fatkeqësisht Gjykata Ndërkombëtare Penale nuk ka juridiksion për çështjen mes Ukrainës dhe Rusisë. Rusia nuk është anëtare e gjykatës. Nga ana tjetër, Ukraina ka dorëzuar deklarata, por nuk aderon në Statutin e Romës. Kjo do të thotë se Gjykata nuk ka kompetenca për të gjykuar agresionin. Ky është problemi kryesor”.

Larg nga Gjykata e Hagës, Komisioni Evropian po konsideron dy opsione për procedimin e krimit të agresionit: Një gjykatë ndërkombëtare dhe e pavarur e tipit “ad hoc”, ose një gjykatë hibride speciale e ngritur në sistemin gjyqësor ukrainas, por e përbërë nga gjyqtarë ndërkombëtarë.

“Këtu kemi një vështirësi politike që po bën shumë shtete të Asamblesë së Përgjithshme të OKB-së të bien dakord për një gjykatë të tillë. Ndaj është një problem politik dhe ka disa pengesa përpara”, deklaron Jordash.

Situata ligjore është rrjedhimisht e komplikuar. Por ka edhe shembuj specifikë për krijimin e një gjykate speciale ndërkombëtare, si ai kundër ish-liderit serb Sllobodan Millosheviç, apo gjyqi i Nurembergut kundër liderëve nazistë.

“Millosheviçi nuk e mendonte kurrë se mund të gjendej në një gjykatë e po ashtu as Hermann Goering në 1942-shin. Tre vjet më vonë, ai dhe arkitektët e gjenocidit nazist u ndodhën përpara një gjykate ndërkombëtare. Ndaj, ne nuk po fantazojmë, pasi ka precedentë për liderë si Putin, që i kalojnë ditët e fundit të jetës në beteja ligjore nëpër gjykata”, tha Jordash.

LEXONI GJITHASHTU: 

• Zelensky thotë se ka filluar kundërsulmi ukrainas
• Putin: Kundërofensiva ukrainase ka dështuar, por kanë ende potencial sulmues