Wagner 400 km larg Moskës, guvernatori i Lipetsk konfirmon lëvizjet e mercenarëve

Guvernatori i rajonit të Lipetsk, Igor Artamonov, ka konfirmuar se Wagner po lëviz me pajisjet ushtarake në autostradën që të çon drejt Moskës.

Siç shihet dhe nga harta e mëposhtme qyteti i Lipetsk ndodhet 400 km larg kryeqytetit rus.

Duke shkruar në mediat sociale, Artamonov tha: “Agjencitë e zbatimit të ligjit dhe autoritetet… po marrin të gjitha masat e nevojshme për të garantuar sigurinë e popullatës. Situata është nën kontroll.”

Artamonov gjithashtu u kujtoi banorëve se “ata këshillohen fuqimisht të mos largohen nga shtëpitë e tyre dhe të shmangin udhëtimet me çdo mjet”.

Grupi Wagner pretendon se ka marrë kontrollin e të gjitha objekteve ushtarake në qytetin jugor të Rostov-on-Don, mediat e huaja raportojnë se mercenarët kanë marrë dhe objekte në Voronezh – qytet më në veri.

Rostov ka luajtur një rol kyç që nga pushtimi i plotë i Ukrainës nga Rusia në shkurt 2022.

I vendosur afër kufirit me Ukrainën, Rostov – me një popullsi prej vetëm një milion – strehon selinë kryesore të Qarkut Ushtarak Jugor të Rusisë.

Trupat ruse shpesh vendosen në qytet përpara se të dërgohen në Ukrainë.

Kryeqyteti rajonal ka qenë gjithashtu një qendër e rëndësishme logjistike për dërgesat e armatimit dhe karburantit.

Voronezh – një tjetër kryeqytet rajonal jo shumë larg kufirit ukrainas – ka përafërsisht të njëjtën madhësi si Rostov.

Qyteti shtrihet në gjysmë të rrugës midis Rostovit dhe kryeqytetit Moskë dhe është një qendër kryesore hekurudhore.

LEXONI GJITHASHTU:

• VIDEO| Wagner drejt Moskës, hyrja e qytetit blindohet nga kamionë me rërë
• Nga shitës hamburgerësh në krye të mercenarëve, kush është ‘kuzhinieri’ i Wagner
• BBC publikon pamjet, autokolona e Wagner rrugës drejt Moskës