Kurti: Kemi informacione që në kisha fshihet armatim, do takoj përfaqësesit e NATO

Deputetja e parlamentit britanik, Alicia Kearns, deklaroi të martën se ka informacione se serbët e Kosovës po kontrabandojnë armë përmes autoambulancave dhe po i fshehin ato në  kisha në veri të Kosovës.

Në lidhje me këto deklarata reagoi dhe kryeministri i Kosovës Albin Kurti, i cili konfirmoi gjithashtu informacionet se ambulancat në veri të Kosovës janë përdorur për të transportuar armatim.

Kurti shtoi se pritet të ketë dhe një takim me përfaqësuesit e NATO-s dhe KFOR-it këtë të mërkurë, ku do të diskutojë me ta situatën e armatimit në veri.

“Kemi informacion se veturat e ambulancave janë përdorur për të bartur armatim. Unë sot do ta kem një takim me përfaqësuesit e NATO-s për këtë gjë. Do ta takoj edhe komandantin e KFOR-it. Dhe pas këtyre takimeve edhe me organet tona të sigurisë, do të mund ta japim fjalën përfundimtare.

Jemi duke grumbulluar të dhëna dhe informacione. Nuk është mirë që unë të jap informacion për informacionin ende të paplotësuar, por brenda kësaj jave duhet të dihet kjo çështje. Andaj, sot kam një takim ku do të shtrohet kjo temë”, u shpreh kreu i ekzekutivit.

Çfarë deklaroi deputetja britanike?

Qeveria është e vetëdijshme, me regjiment ushtarak britanik që sapo janë kthyer nga shërbimi në KFOR, se ka armë që kontrabandohen përtej kufirit nga Serbia në kishat ortodokse me ambulanca. Kur trupat tona janë vënë në dijeni për këtë dhe janë përpjekur të marrin leje për të shkuar dhe për t’i marrë ato, procesi i lejes zgjati shumë. Në momentin kur kishte leje një ambulancë kishte shkuar në kishë dhe i kishte nxjerrë jashtë përsëri të gjitha armët.