Ekstradohen nga Franca dhe Gjermania dy persona të shpallur në kërkim ndërkombëtar 

Interpol Tirana ka ekstraduar nga Franca dhe Gjermania 2 shtetas të shpallur në kërkim ndërkombëtar.

Burime policore bëjnë me dije se u krye ekstradimi nga Franca drejt vendit tonë, i shtetasit Aranit Susaj, 38 vjeç, banues në Tiranë.

“Shtetasi Aranit Susaj ishte shpallur në kërkim ndërkombëtar, pasi Gjykata e Apelit Shkodër e ka dënuar me 8 vjet burgim për veprën penale ”Vjedhja me dhunë” kryer në bashkëpunim. Ky shtetas, në bashkëpunim me dy shtetas të tjerë, në vitin 2010, ka kryer vjedhje me dhunë në banesën e shtetasit P. L. në fshatin Grude e re, Shkodër.

Gjithashtu, ky shtetas ishte i shpallur në kërkim kombëtar nga Komisariati i Policisë Tropojë, për veprën penale “Falsifikimi dokumenteve”. Gjykata e Shkallës së Parë Tropojë e ka dënuar me 1 vit burgim për këtë vepër penale”, sqaron policia.

Po nga Interpol Tirana është bërë ekstradimi nga Gjermania drejt vendit tonë, i shtetasit shqiptar Altin Koci, 46 vjeç, lindur në Lushnjë.

“Ky shtetas ishte shpallur në kërkim ndërkombëtar, pasi  Gjykata e  Shkallës së Parë për Krimet e Rënda Tiranë,  në vitin 2016,  e ka dënuar me 8 vjet burg, për veprën penale  “Trafikim i lëndëve narkotike”, mbetur në tentativë. 

Më datë 15.07.2015, në Port Durrës, gjatë një kontrolli policor në automjetin që drejtonte ky shtetas u gjet një sasi prej 8 kg e 423 gramë lëndë narkotike heroinë, të cilën ky shtetas, në bashkëpunim me të tjerë, po tentonte ta trafikonte jashtë vendit”, bëjnë me dije burime policore.