Shkarkimi i Trump, demokratët dorëzojnë kërkesën në Kongres

Demokratët në Shtetet e Bashkuara i kanë paraqitur zyrtarisht Dhomës së Përfaqësuesve nenin për inkriminimin e Donald Trump, për nxitje të mbështetësve të tij për të sulmuar Capitol Hill, ngjarje kjo e javës së kaluar që la 5 të vdekur dhe disa të plagosur.

Akuza që rëndon ndaj presidentit në ikje është ajo e “nxitjes së kryengritjes”. Katër faqet e dokumentit i referohen gjithashtu deklaratave të tij të rreme për një fitore kundër Joe Biden, presioneve të tij ndaj zyrtarëve të shtetit të Georgia-s për të përmbysur rezultatin dhe në fund, mitingun ku u kërkoi mbështetësve të mësynin Kongresin.

Dhoma amerikane e Përfaqësuesve po shkurton kohën për largimin e Trump dhe i ka prezantuar një rezolutë edhe zëvendës presidentit Mike Pence, të cilit i kërkohet të zbatojë amendamentin e 25-të, që i jep atij autoritetin për të shkarkuar Trump dhe gjithashtu 24 orë kohë për të dhënë një përgjigje.

Nëse Pence nuk vepron, sikurse pritet, Dhoma e Përfaqësuesve do të nisë të mërkurën debatin mbi nenin e dorëzuar këtë të hënë. Nëse Trump inkriminohet për herë të dytë, Senati do të mbajë një gjyq për të vendosur nëse ta dënojë atë apo jo për akuzën e “nxitjes së kryengritjes”.