Gjeorgjia e quan Rusinë “agresore” në përvjetorin e luftës

Kryeministri i Gjeorgjisë, Irakli Garibashvili, e quajti Rusinë “agresore” më 8 gusht, në 15-vjetorin e luftës mes dy shteteve për rajonin e shkëputur.

Rusia dërgoi mijëra trupa në Gjeorgji më 8 gusht të vitit 2008, pasi Tbilisi nisi një operacion ushtarak në shkallë të gjerë në Osetinë Jugore ndaj separatistëve, të cilët kishin bombarduar fshatrat gjeorgjiane në rajon.

“Ne e kemi ditur për një kohë të gjatë se Rusia është agresore, e kemi ditur dhe tani edhe e gjithë bota e di”, tha Garibashvili për gazetarët.

Qeveria e Garibashvilit është kritikuar nga opozita se ka prirje pro-ruse.

Rusia shkatërroi ushtrinë e vogël të Gjeorgjisë më 2008, duke pushtuar territorin gjatë pesë ditëve luftë. Më pas, presidenti i atëhershëm i Francës, Nicolas Sarkozy, ndërmjetësoi një marrëveshje armëpushimi.

Ish-presidenti i Rusisë, Dmitry Medvedev, që autorizoi veprimin ushtarak më 2008, mbrojti veprimet e Moskës përmes një deklarate të lëshuar në përvjetorin e kësaj lufte.

LEXONI GJITHASHTU:

• Gjeorgjia tërheq ligjin “agjenti i huaj”, ekzekutivi dorëzohet pas protestave
• Gjendja e ish-presidentit të burgosur gjeorgjian ngjall reagime