Nën arrest shtëpie, policia kap 55-vjeçarin e përfshirë në një aksident

Policia në Gjirokastër ka kapur një 55-vjeçar i cili ishte nën arrest shtëpie dhe kishte thyer masën e sigurisë. Kjo u zbulua pasi ky i fundit u përfshi në një aksident rrugor mbrëmjen e së shtunës.

Rreth orës 20:26, në aksin rrugor “Gjirokastër-Kakavije”, automjeti me drejtues shtetasin T. H., 35 vjeç, është përplasur me automjetin me drejtues shtetasin V. Z., 40 vjeç.

Nga përplasja janë dëmtuar lehtë, shtetasi V. Z. dhe pasagjerët në automjetin e tij, shtetasit F. H., 55 vjeç dhe L. H., 20 vjeçe, të cilët aktualisht po marrin ndihmë mjekësore, në spitalin e Gjirokastrës.

Nga verifikimet ka rezultuar se pasagjeri, shtetasi F. H. aktualisht ishte me masë sigurie “Arrest në shtëpi”, të caktuar nga Gjykata, për veprën penale “Prodhimi dhe shitja e narkotikëve”.

Për këtë shkak, u bënë veprimet procedurale për arrestimin në flagrancë të 55-vjeçarit, për veprën penale “Largimi i të burgosurit nga vendi i qëndrimit”.

Vijojnë hetimet për zbardhjen e shkakut të aksidentit dhe për dokumentimin e përgjegjësisë penale të shtetasit F. H.

LEXONI GJITHASHTU:

• Përplasen 2 automjete në Gjirokastër, 4 të plagosur
• Gjirokastra intrigon italianët, rritet numri i turistëve të huaj