Ukraina do dështojë, inteligjenca amerikane: Kundërofensiva s’i arrin objektivat

Shërbimet amerikane të inteligjencës vlerësojnë se kundërofensiva e Ukrainës nuk do të arrijë deri në Melitopol, qyteti i rëndësishëm në jug-lindje të vendit.

Lajmin e kanë bërë të ditur burime anonime në dijeni të informacioneve të tilla për gazetën “Washington Post”.

Bëhet fjalë për një parashikim, që nëse rezulton i saktë, do të thotë që Kievi nuk do të mund të arrijë një nga objektivat kryesorë të kundërofensivës së tij, ose që brenda vitit të bllokojë korridorin tokësor që lidh Rusinë me Krimenë.

Vlerësimi i publikuar në “Washington Post” bazohet mbi analizat e kryera mbi kapacitetet e palës ruse që të mbrojë territorin e pushtuar përmes kampeve të minuara dhe llogoreve.

Gjasat janë që kjo analizë të ngrejë në Kiev dhe në kryeqytetet perëndimore pyetjen: përse duhet të mbahet një kundërofensivë, për të cilën po investohen dhjetëra miliarda dollarë në armatime dhe pajisje perëndimore, nëse nuk arrihet dot objektivi i saj?

Ndërkohë, një raport i shërbimeve inteligjente të qeverisë britanike thotë se trupat ukrainase kanë vijuar avancimin e tyre në jug, përgjatë bregut të lumit Mokri Jali, duke marrë nën kontroll fshatin Urozhaine pavarësisht rezistencës së ashpër ruse.

Ndërsa në veri, vijon raporti i publikuar nga “The Guardian”, trupat ruse kanë vazhduar të kryejnë sulme në zonën e Kupianskut, por nuk kanë arritur progrese domethënëse.

LEXONI GJITHASHTU:

• OKB jep alarmin: Armët për Ukrainën mund të bien në duar të gabuara
• SHBA miraton dërgimin e aeroplanëve F-16 në Ukrainë përmes Danimarkës dhe Holandës